مه‌هاباد تۆ به‌ مێژوو، سابڵاغی
گه‌لێكت سارد و گه‌رمی دیت و داغی
له‌ زانایان و لاوان كوێر نه‌بۆوه‌
له‌ سایه‌ی تۆ «بوداغ سوڵتان» وه‌جاغی
گوڵی گوڵزاری، شاری كورده‌واری
گوڵستان و به‌هارستان و باغی
به‌هاران قه‌ڵبه‌زه‌ی ڕووباری تۆیه‌
دڵی لاوان ده‌كێشێ بۆ قه‌راغی
له‌ شادی دیمه‌نی تۆ خونچه‌ پشكووت
له‌ عیشقی تۆ بزووت بولبول ده‌ماغی
له‌ شاخان كه‌و ده‌قاسپێنن به‌یانان
هه‌تا به‌رزه‌، «خه‌زایی» و «قوڵقوڵاغی»
گه‌ڕاوی «پردی سوور» و نێو «گڕاو»ی
بڕۆ بۆ «فه‌قره‌قا» و سه‌یری وه‌تاغی
«مه‌لا جامی» و «بوداغ سوڵتان» وه‌لی بوون
«وه‌فایی» بولبولی تۆ بوو له‌ باغی
هه‌تا وه‌ختێكی «زاواوبووك» درواسێن
هه‌تا «سوڵتان وه‌جاغه‌» و «بوغده‌داغی»
ده‌خوازێ «ئه‌فخه‌می» سه‌ربه‌رزیی تۆ
گه‌لت خۆش كا خودا دایم به‌ ساغی