ڕۆژی چوارشه‌ممه‌(14-04-2004) دوو هه‌واڵی گرینگ و له‌ هه‌مان كاتدا ناكۆك و دژبه‌یه‌ك، سه‌ردێڕی زۆربه‌ی ڕۆژنامه‌ و سایته‌ جۆربه‌جۆره‌كان و له‌وانه‌ سایتی فارسیی«بی ی سی» بوون؛ یه‌كه‌میان: «ئاماده‌بوونی ئه‌مریكا بۆ ناردنی هێزی زۆرتر بۆ عێراق» و، دووهه‌میان: سه‌فه‌ری هه‌یئه‌تێكی ئێرانی به‌ره‌و به‌غدا، بۆ یارمه‌تیدان به‌ چاره‌سه‌ركردنی قه‌یرانی عێراق».

ناوه‌رۆك و مانا و مه‌به‌ستی هه‌واڵی یه‌كه‌م به‌ پوختی و چوختی ئه‌وه‌یه‌ كه‌ ئه‌مریكا حازر نییه‌ و حازریش نابێ، سیاسه‌ت و ستراتێژیی درێژخایه‌نی خۆی به‌تایبه‌ت سه‌باره‌ت به‌ ناوچه‌ی ڕۆژهه‌ڵاتی ناوه‌ڕاست به‌ خاتری چه‌ند ڕووداوی لاوه‌كی بگۆڕێ و لێی پاشگه‌ز بێته‌وه‌. دیاره‌،  ئه‌و بگر و هه‌ڵڵایه‌ش كه‌ حیزبی دێمۆكراتی ئه‌مریكا له‌ قۆناخی ئێسته‌دا بۆ پڕوپاگه‌نده‌ی هه‌ڵبژاردنی ده‌وره‌ی سه‌رۆككۆماریی داهاتوو، له‌ دژی حیزبی جه‌مهووریخواز و سه‌رۆك بووش وه‌ڕێی خستووه‌، كاتی و تێپه‌ڕه‌ و، ئه‌گه‌ر ئه‌وانیش ده‌سه‌ڵات به‌ ده‌سته‌وه‌ بگرن، دیسان ئه‌و سیاسه‌ته‌ به‌ شێوه‌یه‌ك له‌ شێوه‌كان هه‌ر درێژه‌ی پێده‌درێ.
هه‌ڵبه‌ت‌ نابه‌جێ نابێ ئه‌گه‌ر بڵێین ڕووداوه‌كانی ئه‌و یه‌كدووحه‌وتوویه‌ی عێراق، به‌شێكی زۆری، ئاكامی كێبه‌ركێ و ڕقه‌به‌رێتی هه‌ڵبژاردن و ته‌نانه‌ت جیاوازیی بیرو بۆچوون و شێوازی چاره‌سه‌ركردنی كێشه‌كان له‌ نێوان خودی داموده‌زگای به‌ڕێوه‌به‌رایه‌تی ده‌وڵه‌تی سه‌رۆك بووش بوون.
كاكڵ و په‌یامی هه‌واڵی دووهه‌میش ئه‌وه‌یه‌ كه‌ كۆماری ئیسلامی ئێران وه‌ك نوێنه‌ر و دمڕاستی جیهانی ئیسلام و به‌تایبه‌ت شیعه‌ (ئه‌و جۆره‌ی كه‌ ده‌سه‌ڵاتدارانی ئیرانی پێیانوایه‌ و نایشارنه‌وه‌)، ده‌یه‌وێ  له‌و وه‌زعه‌ی كه‌ ئه‌مریكا تێی كه‌وتووه‌، باشترین سوود و به‌رژه‌وه‌ندیی پێوست به‌ده‌ست بێنێ و به‌ كورتی گوێچی خۆی له‌م ئاژاوه‌ و گێڕه‌شێوێنییه‌ی كه‌ به‌هۆی تاقمی «سه‌در – و- زیارتكه‌ره‌ ئێرانییه‌كان» و «فه‌لووجه‌ییه‌كان» وه‌ڕێخراوه‌، بڕفێنێ و، یان ئه‌گه‌ر له‌م گه‌مه‌یه‌دا وه‌ك «قڕه‌» له‌ بری مته‌ دۆڕاوه‌كانیدا نه‌‌یتوانی قان له‌  ئه‌مریكاییه‌كان وه‌رگرێ، ئه‌وا وێڕای‌ قڕه‌قڕ‌ و ته‌شقه‌ڵه‌ به‌ تیرێك دوو نیشان بنگێوێ:
1) كه‌ڵكوه‌رگرتن له‌ «سه‌در» وه‌ك مۆره‌یه‌كی خاو و كه‌م ته‌جره‌به‌، بۆ وه‌رگرتنی پشك و ئیمتیازه‌ پاشگوێخراوه‌كانی ئه‌م چه‌ند ساڵانه‌ی دوایی له‌لایه‌ن وڵاته ‌یه‌كرتووه‌كانی ئه‌مریكاوه؛
2) دووركردنه‌وه‌ی بڵێسه‌ و ئاوری گۆڕانكارییه‌كان و هه‌ڵبژاردنی عێراق وه‌ك شه‌ڕگه‌یه‌كی له‌بار و گونجا، بۆ تێكهه‌ڵچوونی سیاسی و دیپڵۆماسی - و- ته‌نانه‌ت چه‌كدارییش، له‌ ده‌ره‌وه‌ی سنووره‌كانی خۆی.
شتێكی ئاشكرایه‌ كه‌ ئه‌گه‌ر له‌ داهاتوویه‌كی نیزیكدا ئه‌و ئامانج و مه‌به‌ستانه‌ وه‌ك دامه‌زرانی حكوومه‌تێكی سكۆلار و نامه‌زهه‌بی و دێمۆكراتیك و، دابینكردنی مافی فیدێرالیزم بۆ كوردستانی باشوور و چی و چی له‌ عێراق بێنه‌ دی،  كه‌ به‌ تێكڕایی دژی سیاسه‌ت و ویست و خوازی ده‌سه‌ڵاتدارانی كۆماری ئیسلامی ئێرانه‌، ئه‌وا ته‌واوی هه‌وێتی و هه‌بووگی ڕێژیمی ویلایه‌تی فیقی ده‌كه‌وێته‌ مه‌ترسییه‌وه‌. بۆیه‌ ده‌سه‌ڵاتخواز(پاوانخواز)ه‌كانی ناو حاكمیه‌ت له‌ قوماشی ڕه‌فسنجانی _ مه‌فسنجانی تا ئه‌و جێیه‌ی بۆیان ده‌كرێ _ كورد گوته‌نی: سیاسه‌تی عه‌جه‌مانه‌ی «لێده‌ و هاوراێش بكه‌» ده‌گرنه‌به‌رچاو؛ له‌لایه‌ك، داروده‌سته‌ و تاقمی جۆراوجۆری شیعه‌ و ته‌نانه‌ت ناشیعه‌ش له‌ ژێرچاودێری و ڕێنوێنیی ڕێبه‌ری ڕێژیمی ئیسلامی واته‌ عه‌لی خامنه‌یی، له‌ وڵاتی عێراقدا ته‌یار و چه‌كدار ده‌كرێن و له‌ لایه‌كی دیكه‌وه‌، له‌ زمان كارگێڕ و كاردارانی ده‌وڵه‌تییه‌وه‌ وه‌ك خاته‌می و خه‌ڕازی، وا ڕاده‌گه‌یێندرێ كه‌ ڕێژیمی ئێران به‌ هیچ شێوه‌یه‌ك دست له‌ كاروباری ناوه‌وه‌ی عێراق وه‌رنادا و خوداخودایه‌تی بارودۆخه‌كه‌ ئارام بێته‌وه‌!
هه‌رچه‌ند كه‌س باوه‌ڕ به‌م قسه‌ و ده‌ربڕینانه‌یان‌ ناكا، به‌ڵام كێ ده‌ڵێ ئه‌مریكا و _ ته‌نانه‌ت ئوڕووپاش له‌ پێناو هێندێك مه‌به‌ستی دیاریكراو _  له‌ خودای ناوێ كه‌ سه‌ره‌هه‌ودایه‌ك وه‌ك پرێسیپی ده‌وڵه‌تی له‌و ده‌ستێوه‌ردانه‌ی ئێرانییه‌كان بدۆزرێته‌وه‌ و له‌ داهاتوودا نه‌كرێته‌ بیانووی تێهه‌ڵپێچان و گڕنه‌پێگرتنێكی زۆرتر؟!