به‌ بۆنه‌ی ساڵڕۆژی مه‌رگی لوجیانۆ بێریۆ 2003-1925، ئاهه‌نگسازی گه‌وره‌ی ئیتالیایی، ئاكادێمی سه‌ڵته‌نه‌تیی مۆسیقا، ناوه‌ندی ساوز بانك و له‌نده‌ن سینفۆنێتتا، جێژنێكیان به‌ یادی ئه‌و ئاهه‌نگسازه‌ له‌ بنكه‌ی ڕۆیاڵ فێستیڤاڵی له‌نده‌ن به‌ڕێوه‌برد.
ئه‌و ڕێوڕه‌سمه‌  له‌ ڕۆژی 15ی ئاوریل ده‌ستپێكرا و تا ڕۆژی 30 مانگ درێژه‌ی كێشا. ڕۆژی یه‌كشه‌مۆ 25ی مانگ، به‌رنامه‌یه‌ك له‌ ژێر عینوانی «نه‌غمه‌ خۆماڵیییه‌كان» به‌ڕێوه‌چوو كه‌ تێیدا گروپگه‌لێكی جۆراوجۆر له‌ وڵاته‌ جۆربه‌جۆره‌كانه‌وه‌ بانگهێشت كرابوون.

كامكاره‌كان كه‌ خاوه‌نپێشینه‌ترین و ڕێكوپێكترین گروپی مۆسیقایین، چه‌ند ساڵێكه‌ لێكدا لێكدا له‌ به‌رنامه‌ جیهانییه‌كانی مۆسیقای خۆماڵییدا بانگ ده‌كرێن، كه‌ له‌ ڕێو‌ڕه‌سمی به‌خشینی خه‌ڵاتی ئاشتی به‌ خاتوو «شیرینی عیبادی»یش به‌شداربوون و چه‌ند بڕگه‌یه‌كیان له‌ مۆسیقای خۆماڵیی كوردستان پێشكێش كرد.
هوشه‌نگی كامكار، به‌ڕێوه‌به‌ر و به‌ركاری هونه‌ریی گروپی كامكاره‌كان، هۆی بانگهێشتی ئه‌و گروپه‌ بۆ جێژنی ڕێزلێنانی لوجیانۆ بێریۆی به‌ پێخۆشبوونی شه‌خسی وی به‌ مۆسیقای كوردی و گروپی كامكاره‌كان به‌سته‌وه‌ كه‌ به‌ر له‌ مه‌رگی خۆی بینه‌ری كۆنسێرتی ئه‌و گروپه‌ له‌ له‌نده‌ن بووه‌.

كۆنسێرتی كامكاره‌كان به‌ پێشكێشكردنی ئاهه‌نگی «گه‌لاوێژ» ده‌ستپێكرا و به‌ دوای ئه‌ودا ئاهه‌نگه‌كانی سنجانه‌، شیرین، قاسمخان، وێردخوێنی و هه‌ڵاڵه‌ ئیجڕاكران. دوو بڕگه‌ی ئاخر كه‌ له‌ سازكراوه‌كانی هوشه‌نگی كامكاره، ده‌ربڕینێكی نوێ و جیاوازیان هه‌بوو:
(: A- B).
هاوئاهه‌نگیی، ڕێكێتی به‌جێی بڕگه‌كان و لێهاتوویی له‌ لێدانیان، له‌ تایبه‌تمه‌ندییه‌كانی ئه‌و گروپه‌ له‌ جێژنی له‌نده‌ن بوو.

ده‌نگی سه‌بای كامكار، كچی هوشه‌نگی كامكاریش ڕوحی وه‌به‌ر ئیجڕای ئاهه‌نگه‌كانه‌وه‌ ده‌نا، ‌هه‌رچه‌ند ده‌نگی وی وه‌كوو كۆڕخوێن ده‌بیسترا؛ به‌ڵام له‌وانه‌یه‌ به‌ گوێره‌ی هێندێك تێبینیی، تاكخوێنیی ئه‌ویان له‌ ئاهه‌نگه‌كاندا نه‌گونجاندبێ.
ڕه‌نگه‌ كامكاره‌كان _ به‌ عینوانی ناسراوترین گروپی مۆسیقای خۆماڵیی و ئێرانی له‌ ده‌ره‌وه‌ی ئێران _ ته‌نیا گروپێك بن كه‌ به‌ پێوانه‌ی گروپه‌ مۆسیقاییه‌كانی ڕۆژئاوا، بكرێ نێوی گروپیان به‌ سردا ببڕێ.
هاوكاریی له‌مێژینه‌ی ئه‌ندامانی گروپ، خۆڕاهێننانی هه‌میشه‌یی، شێوازی مۆسیقا، لێهاتوویی و شاره‌زایی به‌شێك له‌ مۆسیقاژه‌نه‌كانی ئه‌و گروپه‌ له‌ ژه‌نینی سازه‌ شازه‌كانیاندا، گروپی كامكاره‌كان و مۆسیقای ئه‌وانی كردووه‌ته‌ خۆشه‌ویستترین گروپی مۆسیقایی {كوردی} ئێرانی.
به‌رنامه‌ی «نه‌غمه‌ خۆماڵییه‌كان»، بێجگه‌ له‌ له‌نده‌ن، له‌ شاره‌كانی ئاكسفۆرد، یۆرك، مه‌نچستێر، بیرمه‌نگام و ناتینگهام ئیجڕاكرا. كونسێرتی كامكاره‌كان، به‌ر له‌ ئینگلستان، له‌ جێژنی فه‌رهه‌نگی _ هونه‌ریی «نیزیكیی دووره‌ده‌ست» له‌ شاری بێرڵینیش به‌ڕێوه‌چوو.
موسیقاژه‌ن و گۆرانیبێژانی گروپی كامكار بریتین له‌ هوشه‌نگی كامكار: به‌ڕێوه‌به‌ر و ئاهه‌نگساز، بیژه‌نی كامكار: ده‌فه‌ و ڕوباب و ئاواز، په‌شه‌نگی كامكار: سه‌نتوور، قه‌شه‌نگی كامكار: سێتار، ئه‌ڕژه‌نگی كامكار: دمبه‌ك(ته‌پڵ)، ئه‌رسه‌لانی كامكار: عوود و ئاواز، ئه‌رده‌شیری كامكار: كه‌مانچه‌، ئه‌رده‌وانی كامكار: سه‌نتوور و، سه‌بای كامكار: ئاواز.

• • •