ڕۆژی جیهانیی ژنان!

له‌ حاڵێكدا كه‌ ڕۆژی 8ی مارس، وه‌ك ڕۆژی جیهانیی ژنان له‌ زۆربه‌ی وڵاتان، له‌ لایه‌ن ڕێكخراوه‌ جۆراوجۆره‌كانه‌وه‌جێژن ده‌گێرێ، ئێستاش زۆڵم و زۆریی هه‌ره‌ به‌رچاو هه‌رله‌ ژنان ده‌كرێ و، ته‌نانه‌ت له‌ به‌شێكی به‌ربڵاوی ئه‌و جیهانه‌ پان و به‌رینه‌، سه‌ره‌تاییترین مافی سروشتی و ئینسانییان بۆ له‌به‌رچاو ناگیرێ. ئێستاش ئه‌و ناعه‌داڵه‌تی و نادادییه‌ی كه‌ به‌ پێی قانوون و  دابونه‌ریتی كۆنی كۆمه‌ڵایه‌تی و فه‌رهه‌نگی له‌ كیژۆڵان و ژنانی گه‌نج ده‌كرێ هیچ سنوورێكی جۆغرافیایی و ئینسانی ناناسێ و، ڕۆژ نییه‌ كۆمه‌ڵێك له‌و خوداپێنه‌داوانه‌، ده‌سته‌ ده‌سته‌ تووشی نه‌هاتی و بێده‌ره‌تانی و هه‌ناسه‌ساردی و له‌شفرۆشی نه‌بن. بێچاره‌یی و به‌دبه‌ختی ئه‌وانه‌، به‌تایبه‌ت له‌ هێندێك كۆمه‌ڵگه‌ی دواكه‌وتوودا ده‌گاته‌ ڕاده‌یه‌ك كه‌ ئه‌گه‌رمنداڵێكی نێرینه‌ یان پاڵاخێكی كاكۆڵ ڕێڕینه‌ پێشكێشی بنه‌ماڵه‌ باوكسالاره‌كه‌ نه‌كه‌ن، په‌یاغی مه‌رگ و نه‌مان چاوه‌ڕوانیان ده‌كا و به‌ زوویی سه‌ربه‌نیست ده‌كرێن. بۆیه‌ له‌و كۆمه‌ڵگایانه‌ باشترین و به‌نرخترین كارێك كه‌ له‌بری  پیرۆزبایی و ئیرادی فه‌رمایشتی فۆرمالیته‌ و شتی له‌م چه‌شنه‌ ده‌بێ بكرێ،  ئه‌وه‌یه‌ كه‌ مافی سروشتی و ئینسانی هه‌ر بنیاده‌مێك، به‌بێ فه‌رق و جیاوازیی جنسیی ڕێزی لێ بگیرێ و، مافی ژیانی هه‌ر هاووڵاتییه‌ك تێكه‌ڵاوێك بێ له‌ مافی مرۆڤ و ماڤی ژن.