كاسینی، ئه‌و وێنه‌یه‌ی له‌ كاتی تێپه‌ڕبوون له‌ نزیكی فوێبێ دا هه‌ڵگرتووه‌ته‌وه‌. 

كلودیۆ سۆلازۆ، به‌ڕێوه‌به‌ری عه‌مه‌لیاتی هوینگێز(ئامرازی دابه‌زینی كاسینی) له‌ ئاژانسی فه‌زایی ئوڕووپادا به‌ (بی بی سی) گوت: «ئه‌و درزه‌ له‌ نێوان ئاڵقه‌كانی ئێف و جی دا، به‌ته‌واوی له‌ هه‌ر چه‌شنه‌ قه‌واره‌ به‌ربینگگره‌كان بێبه‌ری یه‌. پێشتریش فه‌زاپێوه‌كانی وه‌ك (ڤۆیه‌جێر) و (پیۆنیێر) ده‌ ناو درزی گۆریندا تێپه‌ڕیون».
هه‌روه‌ها گوتی: «به‌ڵام بۆ زۆرتركردنی ڕاده‌ی متمانه‌، هه‌ر چه‌شنه‌ ورده‌ڵێك كه‌ له‌وانه‌یه‌ ده‌ ناو درزه‌كه‌دا بێ، به‌ هۆی ئانتێنی به‌هێزی كاسینی كه‌ زۆر قایم و له‌سه‌رهه‌سته‌ وه‌لاده‌بردرێ.
كاتێك كه‌ كاسینی له‌ ئاڵقه‌كان تێده‌په‌ڕێ، ده‌بێ ماتۆڕه‌كه‌ی ده‌ به‌ستێنی حه‌ڕه‌كه‌تی خۆیدا بسوووڕێنێ و بۆ ماوه‌ی 96 خوله‌ك دایگیرسێنێ. فشاری به‌دیكراو به‌ هۆی ئه‌و كاره‌، خێرایی فه‌زاپێو كه‌م ده‌كاته‌وه‌ تا  له‌ سۆنگه‌ی وزه‌ی ڕاكێشه‌ره‌وه‌ گه‌ڕۆكه‌كه‌ ڕابكێشرێ و ده‌ مه‌داری ویدا جێبگرێ.
پرۆفیسۆر داڤید ساتڤوود، به‌ڕێوه‌به‌ری زانستگه‌لی ئاژانسی فه‌زایی ئوڕووپا، به‌ (بی بی سی) گوت: «ماوه‌ی 90 خوله‌ك ده‌خایه‌نێ تا  نیشانه‌گه‌لی ڕادیۆیی كاسینی له‌ كه‌یوانه‌وه‌ بگاته‌ زه‌وی. ئه‌و به‌شه‌ له‌ ڕاسپێرییه‌كه‌ بۆ ئێمه‌ پشووگر و ئه‌سته‌م ده‌بێ».
كاسینی دوای هه‌ڵكردنی ماتۆڕی خۆی، له‌ نزیكترین مه‌ودای هه‌ڵكوتوو له‌ كه‌یوان، واته‌ له‌   18.000كیلۆمیتری ویدا ئاقارده‌گرێ.
چاوه‌ڕوان ده‌كرێ ئه‌و فه‌زاپێوه‌ له‌و مه‌ودا نزیكه‌ڕا وێنه‌گه‌لێكی سه‌رسووڕهێنه‌ر سه‌باره‌ت به‌ گه‌ڕۆك و ئاڵقه‌كانی ئاماده‌ بكا. ئه‌و وێنانه‌ له‌وانه‌یه‌ ئاخرییه‌كانی ڕۆژی پێنجشه‌مۆ بگه‌نه‌ زه‌وی.
كاسینی له‌ كآتی تێپه‌ڕبوونیدا له‌ نزیكی فوێبێ، یه‌كێك له‌ مانگه‌ نائاساییه‌كانی كه‌یوان _ له‌ ڕۆژی 13ی ژوئێن دا، زانیاریگه‌لێكی پڕبایه‌خی كۆكردبووه‌وه‌. به‌ڵام زانایان ده‌ڵێن ئه‌و به‌شه‌ له‌ ڕاسپێرییه‌كه‌ ته‌نیا پێشده‌ركه‌وتی شاكارێكه‌ كه‌ كاسینی گه‌ره‌كیه‌ بیئافرێنێ.
ئه‌و فه‌زاپێوه‌ له‌ مانگی دێسامبر{2004}دا، یه‌كه‌(ئامراز)ی دابه‌زینی خۆی به‌ نێوی هوینگێز بۆ ناو ته‌شقی چڕوپڕی مه‌زنترین مانگی كه‌یوان، واته‌ «تیتان» ڕه‌وانه‌ده‌كا.

سه‌رچاوه‌: وه‌رگیران و وه‌ڕگێڕانه‌وه‌ له‌ سایتی فارسیی بی بی سی_ س. چ هێرش.