که‌ی دێیته‌وه‌
شانه‌ی وشه‌ت
پرچی ئاڵۆزی دڵم بۆ دابێنێ و
گه‌لاوێژی گڕ پرژێنت
ژووری ساردی ته‌نیاییه‌که‌م
پڕ له‌ باخی خۆشه‌ویستی و
بۆنی گه‌نمی ئه‌وین بکا و
لاسکی شادیم به ‌موسیقای پێکه‌نینت هه‌ڵپه‌ڕێت و
زایه‌ڵه‌ی ژین له‌ کۆڵانی ده‌مارمدا
درگاکانی به‌ ماته‌مین داخراوی سلوله‌کان بکاته‌وه‌

که‌ی‌ دێیته‌وه‌
ئاوازی پێت
کۆترێکه‌ که‌ پێش له‌ خۆت
له ‌په‌نجه‌ره‌ ئاوه‌ڵاکه‌ی رووه‌و کۆڵان
ئه‌خوشێته‌ نێو ژووره‌که‌م و
به‌ گمه‌ گم
مزگێنی تۆ
وه‌کو بۆنی گوڵه‌ باخی به‌ربه‌یانان
ئه‌ڕژێنێته‌ نێو ژینگه‌که‌م

ئه‌گه‌ر هاتی
به ‌قووڵایی هه‌ناسه‌یه‌ک
له‌ ئینجانه‌ی دڵی هه‌موو ئازیزانم
بۆنی سه‌وزی خۆشه‌ویستیم بۆ هه‌ڵمژه‌ و
له‌ باخه‌ڵی سییه‌کانتا بیشاره‌وه‌ و
له ‌یه‌که‌مین دیدارمانا
کاتێ لێوی جامی ده‌ممان له‌یه‌ک ئه‌ده‌ین
بیکه‌ زارم بیخۆمه‌وه‌
نه‌کو سه‌گی پولیسه‌کان پی بزانێ و
له ‌سه‌رخۆشیی چه‌ن ساته‌یه‌ک بێ به‌ریم کات.

• • •

safaryani@yahoo.se