بۆیه خۆشم ئه‌وێی!

• كه‌ژاڵ ئیسماعیل •

 

چه‌نده خۆشه..
ئه‌و ساته‌ی پێم ئه‌ڵێی
خۆشم ئه‌وێی
ئه‌زانم پێت ناخۆشه..
كه لێت ‌ئه‌پرسم
بۆ..؟

منیش وه‌ك هه‌موو ژنێك
دوو چاو  و
دوو لێو و
یه‌ك دڵم هه‌یه..!
پێم ئه‌ڵێی لێم مه‌پرسه
بۆ..؟!
خۆشم ئه‌و‌ێیت و بۆیه!

دوو چاوی تۆ پڕن له ‌نهێنی
پڕن له ‌ڕه‌نگی تابلۆیه‌كی سیحراوی و
دوو لێوت وه‌ك بۆڵه‌كانی
هێشووه ترێیه‌كی ته‌مووز
تامی شه‌راب ئه‌ده‌ن و..
دڵیشت كۆشكی میهره‌بانی یه
خۆشم ئه‌وێیت و بۆیه!

لێت ئه‌پرسم..
هه‌موو ژنێك چاوی جوانه ‌و
لێوی ئاڵه ‌و
دڵی میهره‌بانه
ئیتر بۆچی خۆشت ئه‌وێم؟

پێم ئه‌ڵێی..
چاوه‌كانت دوو ڕاوچین و
زۆر ده‌مێكه دڵی منیان پێكاوه
لێوه‌كانت دوو كۆترن و
بانگی ئه‌شقی لێوه‌كانم ئه‌كه‌ن
بۆ ماچ
دڵیشت به‌ندیخانه‌ی ئه‌زه‌لی منه
ئیتر لێم مه‌پرسه..
بۆ..؟!
خۆشم ئه‌وێیت و بۆیه‌!

هۆڵه‌ندا، 04-07-2006

• • •