یه‌که‌م/ رۆیشتن
قژم گێژه‌ له ‌مه‌راقا
ته‌پاو تلى زۆر کردووه‌
دڵم ئه‌ڵێى چه‌ندان سه‌ده‌
به ‌پێوه‌ ئێشکى گرتووه‌
چه‌ند شه‌وێکه‌ هیچ نه‌نوستووم
سوێند ده‌خۆم هه‌ر ئه‌ڵیی مردووم
کل به‌چاومه‌وه‌ به‌نگنابێ و
تیشێرته‌ شینه ‌کاڵه‌که‌م
له ‌شه‌وى ده‌یجور ڕه‌شتره‌
له‌و ساته‌وه‌ى که ‌وتووته
به‌م زووانه‌ ده‌ڕۆم، سه‌فه‌رئه‌که‌مه‌وه‌
له‌خۆمه‌وه‌ مات و په‌ستم
بیر له ‌رۆژى دابڕان و رۆیشتنه‌که‌ت ئه‌که‌مه‌وه‌.

دووه‌م/ گه‌ڕانه‌وه‌
گوڵى سوورى کراسه‌که‌م پێئه‌که‌نێ
ته‌نانه‌ت ته‌وقه‌ سه‌وزه‌که‌ى سه‌ریشم
که ‌له‌ته‌ک گه‌ڵاى کراس و
ره‌نگى پانتۆڵه‌که‌مدا رێکم خستووه‌
ده‌مم بۆ نایه‌ته‌وه‌یه‌ک
بزه‌م دێت و خه‌نده‌م ده‌ڕوات
سووراوه‌که‌م له‌خۆیه‌وه‌
بۆخۆى تۆخ تۆخ ئه‌بێته‌وه‌
تام لێدێت و لێوم وه‌خته‌ حه‌یام ئه‌بات
له ‌به‌رئه‌وه‌ى، هه‌ر به‌ته‌نیا له ‌به‌رئه‌وه‌ى
من دێڕێکم له‌ ئیمه‌یلێک خوێندۆته‌وه‌
پێم ده‌ڵێت به‌م نزیکانه‌ ده‌گه‌ڕێمه‌وه‌ بۆ وڵات!

• • •