شێعر: ڕاستی و درۆ

• س. چ. هێرش

له‌مێژ ساڵه‌ لــــــــه‌‌ نێو ڕاستی و درۆیه‌
شــــــــه‌ڕ و كێشه‌ و هه‌را و بــه‌لبه‌شۆیه‌

جیهــــان بازاڕی گــــــــه‌رمی ڕاوه‌ڕووته
ســـــــــه‌روخواری پڕی جه‌رده‌و جه‌لۆیه‌

لــــــــه‌‌‌ نێوان تاجرانی خوێن و باڕووت
مه‌زاتی سه‌ر له ‌ســـــــه‌ر كه‌وڵی مرۆیه‌

ده‌ڵێی ڕ‌استی نه‌مـــــــــــــاوه‌ ئاسه‌واری
له‌ ســــــــــــه‌ر زاران درۆ خاوه‌ن شكۆیه

ژه‌هــــــــرچێژی ژیــــــان و ژانی مێژووم
كــــــــــه‌‌ ئۆخژنم به‌ یه‌كســـــانی مرۆیه‌

له‌خـــــــــانووچكه‌ی خه‌یاڵمدا خه‌واڵوو
په‌ری شێعرم خه‌ریكی هــــــــــــاتوچۆیه

بڵێی ئاواتی ئینســـــــــــانییم وه‌دی بێ‌
بڵێی ساڕێژبێ ئــــــــه‌‌و زامه‌ی له ‌سۆیه

بڵێی خـــــــــۆی بێته‌وه‌ ده‌ورانی ڕاستی
بگوڕڕێنێ لـــــــــــــــــــه‌‌ به‌رچاوی درۆیه‌:

ئه‌ی ئیبلیسی‌خه‌بیسی پیسی نه‌گریس
له‌ که‌س ڕوون نییه‌ نیهادی تۆ چ تۆیه‌

هــــــــــــه‌‌زار جار ڕه‌نگ بگۆڕی ناسراوی
كـــه‌‌ ئاکارت هـــــــــــه‌‌موو فێڵ و ده‌هۆیه‌

هــــــه‌‌تا که‌ی سه‌نگه‌سار و کوشتنی ژن
له‌ هــــــــه‌ر لا ئاهی دایک و  ڕۆڵه‌ڕۆیه‌

گزیری چـــــــــــــــاوزه‌قی زۆرداری زۆڵی
به‌ دارده‌ستی گـــــــــه‌ز و زاری گه‌زۆیه‌

جمه‌ی دێ ژووری زیندانت لــــــــه‌‌ لاوان
که‌چی گه‌نجت‌وه‌کوو ‌گه‌نج ده‌سته‌مۆیه‌

پــــــــــه‌‌رێزی ئاره‌زووی وه‌رزێری زه‌رده‌
ئه‌وه‌ندشین بی له‌سه‌ر‌خه‌رمانی جۆیه‌

له‌ چه‌پ سووڕانی چه‌رخی چاره‌نووسا
لــــه‌‌ چی سڵ کا ئه‌وه‌ی بڕوای به‌ خۆیه‌

له‌ تۆ وایه‌، نه‌مــــــــــاوه‌ كــــه‌‌س بوێرێ
به‌ تۆ بێژێ  كــــه‌ «پشت چاوت برۆیه!»‌

گــوڵی هیوام که‌ په‌ڕپه‌ڕکه‌ی به‌هاران
له‌ سه‌رڕا ده‌رده‌كـــــــــــا ڕیشه‌م چرۆیه‌

شه‌پۆلی په‌نگخوراوی به‌حری تۆڵـــــه‌‌م
که‌ هه‌ڵچوونم له‌ ڕووی تۆ، تف له‌ تۆیه‌

قه‌ڵه‌م چۆن مۆر ده‌کا به‌ڵگه‌ی به‌زیویی
من و ئه‌ستۆکه‌جی و جـــــــــــاوی په‌ڕۆیه‌

شه‌قه‌ی شاباڵی به‌رزیم دێ له‌ عه‌رزی
له‌ کوێ قاژوو ده‌‌كــــــــــــــا ڕاوی هه‌ڵۆیه‌

«مه‌گین وشتر لـــــ‌ــــه‌‌ خه‌ونی دا ببینێ
که‌ یه‌خ بخوا له‌سه‌ر ده‌نکی په‌مۆیه‌!»

پــــــه‌‌ره‌سه‌ند سرشت و خووی سروشته‌
که‌ ‌هـــه‌‌رده‌م ڕه‌وڕه‌وه‌ی مێژوو له‌ ڕۆیه‌

زه‌مانی زرمه‌زرمی تۆ به‌ســــــــه‌‌ر چووه‌
ده‌بێ چۆل که‌ی، به‌سه‌ر شۆڕی سه‌کۆیه‌

ئــــــــــــــــه‌‌من زاده‌ی په‌ریزاده‌ی ئه‌وینم
جیهانی داد و ئــــــــــــــــــــــــــازادم گرۆیه‌

گـــــه‌‌لاوێژی گــــــــڕاوێژی زه‌مـــــــــانه‌م
له‌گه‌ڵ هــــــه‌‌یڤ و هـــــــه‌‌تاوم گفتوگۆیه‌

گوڵووکی ئاگری جه‌رگی (هه‌ڵه‌بجه‌) م
وه‌کوو قه‌قنه‌س که‌ بۆمبای پێ ڕه‌ژۆیه‌

له‌ ژێر ئاسمـــــــــــانی شین و خنجیلانه‌
بـــه‌ره‌و ئاسۆیه‌م و، چـــــــــــاوم له‌ کۆیه‌

گزینگی په‌رچـــــــــــه‌‌می زێڕینی خۆرم
كــــه‌‌ دوندی به‌رزی هه‌ڵگوردم مه‌کۆیه‌

لـــه‌‌ خوێنمدا خوڕه‌ی دێ خۆشه‌ویستی
ده‌خوێنم بۆ گـــــــه‌‌لم به‌سته‌ و گه‌لۆیه‌

سروودی دادخوازیی خه‌ڵکی  كـــــوردم
كـــــه‌ ‌ئــــــــــاواتی وڵاتی ســــه‌‌ربه‌خۆیه‌

به‌هاری 2007

• • •