وه‌ره‌ بولبول بخوێنه‌ به‌ند و به‌ستان
ده‌ پاییزدا، به‌ یادی خـۆشه‌ویستان
به‌ بیری ئه‌و گوڵانی گه‌ش كه‌ وابوو
شه‌واویان خوێنی جه‌رگی گوڵپه‌رستان
له‌ وێرانه‌ی دڵی شه‌یدا ، به‌ ڕووی گوڵ
وه‌ده‌رخه‌، خۆش نه‌وا، گه‌نجی مه‌به‌ستان
مه‌به‌ستی جوان و تازه‌ و شیرین و نوێ
كه‌ هێز باوێته‌ گیانی بێ بڕستان
بڕستی لێ بڕیون ڕه‌نجی دووری
له‌ سه‌روی گوڵشه‌ن و شه‌معی شه‌بوستان
منیش بولبول، وه‌كوو تۆ یه‌ك گوڵم بوو
كه‌ سه‌رتۆپی گوڵانم بوو له‌ كوێستان
له‌ ده‌ستم چوو به‌ شه‌خته‌ی قه‌وسی پاییز
دراوسێی دڵڕه‌ش و پێشه‌نگی زستان
به‌ڵان تۆش وه‌ك من ئه‌ی بولبول نه‌بی كز
هومێدێ به‌رمه‌ده‌،  تێهه‌ڵكه‌ به‌ستان
به‌ سه‌رما و شه‌خته‌ ئازابه‌ و، مه‌وه‌سته‌
له‌ ئیشقی خۆت، كه‌ پیرۆزه‌ نه‌وه‌ستان
له‌ دوای شه‌و ڕۆژه‌، په‌ی زستان به‌هاره‌
ده‌ ڕه‌نجی به‌فرێ دا گه‌نجی گوڵستان
بژی دیمه‌ن گوشاد و شاد و ئازاد
بجۆشێنه‌ به‌ نه‌غمه‌ت بیر و هه‌ستان
ئه‌من «ڕێبوار»م و تۆش نه‌غمه‌سازی
ئه‌من بۆ شادی دڵ، تۆش بۆ گوڵستان
دڵی فه‌رهاده‌ چوو بۆ قه‌سری شیرین
سوپاسی خوایه‌، خوا، بزوێنی هه‌ستان

• • •

سه‌رچاوه‌: سروه‌، ژماره‌194، خه‌رمانانی 1381.