ئاخر من و تۆ
له‌ حیوارێکی گه‌وره‌دا به‌ڕێکه‌وتبووین
که‌چی ته‌م باڵای ڕۆژه‌ نه‌شمیلانه‌کانی داپۆشین..!
شیعره‌ پشکۆییه‌کانی ناو چاوی تۆی کوژانده‌وه..!
ئه‌گه‌رچی به ‌شۆڕه‌بی،
خه‌م و ڕاز و ئێواره‌وه‌
چۆله‌که‌ی گۆرانییه‌‌کانم،
هه‌ر جریوه‌یه‌ك پێیان بوو لێیان ڕژا..
به‌ڵام دڵ،
له ‌شه‌قه‌ی باڵی نه‌دا و
ئاسمانیش له‌ پشت سه‌رمانه‌وه‌،
پێ ده‌که‌نی!
له‌ تابلۆیه‌کی خۆڵه‌مێشیدا،
منت کۆ ده‌کرده‌وه.

له‌ پایزێکی لێڵا، وه‌رینی تۆم
ده‌چنیه‌وه..
که‌ من وشه‌ی گه‌رووی سه‌رنویشتێ بووم،
شیعری وجوودی تۆم پێ وترا،
بۆ بیره‌وه‌ری.
ئیدی ئاوابوونم
تارماییه‌که ‌و، 
چاوه‌ڕێ نابم
له‌ لابه‌لای خه‌وبردنه‌وه‌ی مۆمه‌کانه‌وه‌و
له‌ ژێر بزه‌ی مانگه‌ شه‌وا بێیت و.. بیخوێنیته‌وه‌ !؟

من کوڕی سه‌رده‌می فه‌شه‌ل و
تۆ کچی رۆژگاری
سنگ ده‌رپه‌ڕاندنی چه‌قۆ
به‌ ناو کوچه‌ و کۆڵانی خه‌ونه‌کانا..
تۆ به‌ شه‌قامی منا تێپه‌ڕیت و
ئیدی رێگا نابه‌یته‌وه‌
سه‌ر گیانه‌ڵای ئه‌م چیرۆکه‌..
منیش په‌نجه‌ره‌یه‌کم نه‌ما
بۆ ئاوڕدانه‌وه‌ له‌ حزووری تۆ..

England  مانگی نۆی ٢٠٠٠

• • •