ساڵ دێ و ساڵ ده‌ڕوا.. کاروانی به‌شه‌رییه‌ت بێ وچان هه‌نگاو ده‌نێ به‌ره‌و نوا، ئێمه‌ی کوردی بێ ئه‌نواش قۆناخ قۆناخ به‌ره‌و دوا.. تا دۆێنی هه‌رکه‌س له‌ لایه‌که‌وه‌ ده‌دوا،  که‌ هه‌یداد: «تانج و مه‌ندیل و عه‌گاڵ و په‌پاخ به‌سه‌ر مافمان ده‌خوا، نه‌ ده‌ستمان به‌ داوێنی پیاوچاک و شێخ و مه‌شایخان ڕاده‌گا و، نه‌ هاوارمان ده‌گاته‌ هاوارگه‌ی باره‌گای خوا..!

به‌ڵام، «قسه‌ بیست و چواره‌ و هه‌ر دووی به‌کاره‌» له‌ خۆمان زیاتر کێ تاوانبار و سه‌به‌بکاره‌؟!
دڵمان به‌وه‌ خۆشه‌ و ده‌ڵێین له‌ بنیاتنانی مێژووی ناوچه‌دا مه‌ڵڵاین، که‌چی له‌ نێو خۆدا تاقم تاقم یان خه‌ریکی خۆشاره‌وه‌کێن و قه‌رێقه‌رێن و بگروهه‌ڵڵاین، یان ده‌سته‌ ده‌سته‌ لێره‌وله‌وێ سه‌رگه‌ردان و به‌ڕه‌ڵڵاین..!

له‌ گه‌مه‌ی کێبه‌رکێی سیاسه‌تدا زۆر جار بانگهێشتن کراوین، به‌ڵام هه‌موو جارێ به‌ که‌للای له‌ مزداڕێژراوی په‌لکراوی خۆماڵی، وه‌ک متێکی پێکراوی محانج لێکراوی ئاڵیی خیچاوین و، بۆ قان وه‌رگرتن له‌م و له‌و خه‌ریکی قڕه‌قڕ و چاوه‌چاوین..!

به‌ڵێ ئێمه‌ی کوردی بێ پرۆژه‌ و بێ به‌رنامه‌، کار و کرده‌وه‌مان بێ ئه‌نجام و بێ ئاکامه‌، ده‌یان ساڵی دیکه‌ش تازه‌ بێته‌وه‌ نه‌ قه‌دری ده‌گرین و نه‌ ئه‌زموونی لێ وه‌رده‌گرین، ده‌رگای داهاتوومان له‌ خۆ داخستووه‌ و هه‌ر خۆزگه‌مان به‌ پار خواستووه‌..!

به‌ کورتی، به‌ کام دڵخۆشی و بیر ئاسووده‌یی به‌ره‌و پیری ساڵ بڕۆین که‌ نه‌ ساڵمان ساڵه‌ و نه‌ حاڵمان حاڵ.

س. چ. هێرش

• • •