محه‌مه‌دی ئیمامیی كاشانی له‌ خوتبه‌ی نوێژی جومعه‌(20-08-2004)ی تاراندا، ئه‌و فه‌رمایشانه‌ی خۆی له‌ دژی ئه‌مریكا وه‌ك جومعانه‌ی ڕێژیمی كۆماری ئیسلامی ئێران ئاراسته‌ی نوێژكه‌ران كرد و گوتی:
• لاوانی ئازای موسوڵمان له‌ ئێران، پاكستان، عه‌ره‌بستانی سعوودی و هه‌موو وڵاته‌ ئیسلامییه‌كان، ته‌واوی به‌رژه‌وه‌ندی ئه‌مریكایان ده‌ مه‌ترسی هاویشتووه‌!
• تۆ ڕووی ئه‌مریكات له‌ دنیادا چه‌نده‌ ڕه‌ش كردووه‌. بزانه‌ هه‌ر كارێكی كه‌ ده‌یكه‌ی، هه‌روه‌ك چۆن ئه‌ژدادی تۆ له‌ ڤێتنام كوته‌كیان خوارد و چوونه‌ده‌ره‌وه‌، تۆش (ئه‌ی بووش) له‌ عێراق كوته‌ك ده‌خۆی تا بچیته‌ده‌ره‌وه‌!
• خۆزیا ریفراندۆمێك كه‌ چه‌ند ڕۆژ له‌وه‌ پێش له‌ وێنزۆئێلا به‌ڕێوه‌چوو، له‌ ئه‌مریكا به‌ڕێوه‌بچێ...
• ئاعای بووش مێژوو نی. دوای مه‌رگت، خه‌ڵك كۆته‌ڵی تۆ چاو لێده‌كه‌ن و هه‌ر ئه‌وه‌ی ده‌ڵێن كه‌ سه‌باره‌ت به‌ نێرۆن و هیتلێر ده‌یانگوت. هه‌ڵبه‌ت تۆ له‌ نێرۆن و هیتلێریش خراپتری.
• به‌ نێوی دیمۆكراسی هاتوویه‌ عێراق و هه‌روا ماویه‌وه‌ و ده‌ڵێی دیمۆكراسی. به‌م هه‌موو جینایه‌تانه‌ مێژوونووسان له‌ سه‌رت ده‌نووسن. ئه‌وه‌نده‌ت نفرین بۆ بنێرن ڕووڕه‌شیت بۆ نمێنێته‌وه‌ كه‌ له‌ مێژوودا كه‌متر ڕووڕه‌شێكی وه‌ك تۆ هه‌بێ.
• شوێنه‌كانی جینایه‌ت فه‌رقیان هه‌یه‌. حه‌ڕه‌می ئه‌میری موئمینان كه‌ بۆ هه‌موو جیهان پیرۆزه‌، بۆ بووش پیرۆز نییه‌. له‌و گۆڕه‌پانه‌  كه‌ تۆ گولله‌ی تێده‌گری، خه‌ڵكی شه‌ل و كوێری لێ چاك ده‌بنه‌وه‌. ته‌ڕه‌فی به‌رهه‌ڵستكار (مه‌به‌ست موقته‌دا سه‌دره‌) گوتوویه‌ وتووێژ ده‌كه‌ین، كه‌چی تۆ له‌ ژێرت دا و گوتت نایكه‌ین. یانی گوتت قه‌باڵه‌ (په‌روه‌نده‌) كه‌ له‌ حه‌ڕه‌می ئه‌میری موئمینان به‌تاڵ ده‌كه‌ی؟ تۆ ئه‌وه‌نده‌ ده‌ هه‌ڵه‌ دای؟ تۆ چه‌نده‌ نه‌فامی؟ لێره‌ تازه‌ په‌روه‌نده‌ كراوه‌ته‌وه‌.
• تۆ بڕیارده‌ری كۆشكی سپیی. تۆ نایبینی نه‌زان. نایبینی دنیا نفرینت ده‌كه‌ن. خه‌ڵكی ئه‌مریكا  و كه‌سانێك كه‌ دوای تۆ ده‌بنه‌ سه‌رۆك كۆماری ئه‌مریكا، ده‌بێ تاوانی كاره‌كانت بده‌نه‌وه‌.
• ئه‌تۆ له‌ خه‌ڵكی جیهان خافڵی. ئه‌تۆ كه‌ یه‌كشه‌مۆیان ده‌چیته‌ كڵێسه‌. ده‌ حه‌ڕه‌می ئیماماندا، كازمین، سامه‌ڕا و كه‌ربه‌لا ئینسانگه‌لێك خه‌وتوون كه‌ ئابڕووی مێژوون. نفرین بۆ ئێوه‌ خه‌ڵكێك له‌ ئه‌مریكا كه‌ به‌ جینایه‌تی بووش ڕازین.
• هه‌ڵبه‌ت له‌وانه‌یه‌ بووش له‌ وه‌ڵامی مندا بڵێ كه‌ سه‌هیۆنیسته‌كان منیان هێناوه‌ته‌سه‌ركار و بۆ هه‌ڵبژاردنی دواتریش هه‌ر ده‌یانه‌وێ من سه‌رۆك كۆمار بم، ئه‌وه‌م قه‌بوڵه‌ كه‌ بووش له‌لایه‌ن سه‌هیۆنیسته‌كانه‌وه‌ هاتووه‌ و ئه‌و كارانه‌ ده‌كا.
دیاره‌، ئه‌و قسه‌ و فه‌رمایشانه‌ی ئیمام جومعه‌ی كاتیی تاران، هه‌ر ده‌بێ وه‌ك جومعانه‌یه‌كی ئیسلامییانه‌ چاوی لێبكرێ كه‌ هه‌موو حه‌وتوویه‌ك بۆ پێكه‌نین و ڕابواردن و خه‌ڵك هه‌ڵخه‌ڵه‌تاندن ده‌گوترێن و ده‌گوترێنه‌وه‌. به‌ڵام لێره‌دا نوكته‌یه‌ك كه‌ ده‌بێ جه‌ختی له‌ سه‌ر بكرێ و ئاراسته‌ی ته‌واوی خه‌ڵكی هه‌ڵخه‌ڵه‌تاو و فریوخواردووی ئێران بكرێ ئه‌وه‌یه‌: ئه‌گه‌ر ئیمامی كاشانی (به‌ نوێنه‌رایه‌تی له‌لایه‌ن ڕێبه‌ری ویلایه‌تی فه‌قیهـ و كۆماری ئیسلامی ئێران) ڕاست ده‌كا و ئه‌وه‌نده‌ باوه‌ڕی به‌ دیمۆكراسی و ریفراندۆم و ڕاپرسیی گشتی هه‌یه‌، با بێ ده‌ ڕێگای (خودا و ئاخوند و نیشتمان) دا، ریفراندۆمێك له‌ سه‌ر مانه‌وه‌ یان نه‌مانه‌وه‌ی ڕێژیمی كۆماری ئیسلامی ئێران وه‌رێبخا و،  بزانین خه‌ڵكی موسوڵمانی هه‌میشه‌ حازر له‌ گۆڕه‌پانی هه‌ق و هه‌قیقه‌تدا ده‌ڵێن چی و چه‌نده‌ له‌ ڕێژیم ڕازین؟!

20-08-2004