ئه‌و ده‌سته‌واژه‌یه‌ی سه‌ره‌وه‌ سه‌ردێڕی چاوپێكه‌وتنێكی ڕۆژنامه‌وانی یه‌،  كه‌  ده‌گه‌ڵ محه‌مه‌دی حاجی مه‌حموود سكرتێری حیزبی سۆسیالیستی دیمۆكراتی كوردستان ئه‌نجام دراوه و له‌ بڵاڤۆكی نێوه‌ند (ژماره‌3، پێنج شه‌ممه‌ 5|8|2004)دا چاپ کراوه‌.
هه‌روه‌ك ئاشكرایه‌، له‌ ته‌واوی سستیمه‌ سیاسییه‌كانی جیهاندا وا باوه‌، كه‌ ئه‌و حیزب و ڕێكخراوانه‌ی كه‌ له‌ ده‌ره‌وه‌ی جه‌غزی ده‌سه‌ڵاتدا خه‌ریكی تێكۆشانی سیاسین، تا ئه‌و كاته‌ی كه‌ خۆیان به‌ ده‌سه‌ڵات نه‌گه‌یشتوون، بۆ ڕاكێشانی بیروڕای گشتیی خه‌ڵك، به‌تایبه‌ت له‌ وڵاتانی ڕۆژئاوا له‌ كاتی هه‌ڵبژاردنه‌كاندا،  گه‌لێك ڕه‌خنه‌ی شیاوی سه‌رنج له‌ دژی حیزب و ڕێكخراوه‌ خاوه‌نده‌سه‌ڵاته‌كان ئاراسته‌ی كۆمه‌ڵگا ده‌كه‌ن؛ به‌ڵام هه‌ركه‌ خۆیان پێیان كه‌وته‌ ناو جه‌غزی ده‌سه‌ڵاته‌وه‌، زۆربه‌ی ئه‌و قه‌ول و وه‌عده‌ و به‌ڵێنییانه‌ی كه‌ دابوویان و ده‌یده‌ن فه‌رامۆشی ده‌كه‌ن. هه‌ڵبه‌ت ئه‌وه‌ش بڵێین كه‌ ئه‌و حیزب و ڕێكخراوانه،‌ یان ئه‌و ده‌وڵه‌ت و تاقمه‌ خاوه‌نده‌سه‌ڵاتانه‌ هه‌رئه‌ندازه‌ سه‌ره‌ڕۆ و قۆڕده‌ماغیش بن،  ناتوانن له‌ ئاست قسه‌ و ڕه‌خنه‌ و هه‌ڵسه‌نگاندن و بیروبۆچوونی حیزبه‌ هاوبه‌ر(ئۆپۆزیسیۆن)ه‌كان که‌مته‌رخه‌م بن و،  دره‌نگ یان زوو ته‌ئسیریان لێ وه‌رده‌گرن، به‌تایبه‌ت له‌ پڕۆسه‌ی خه‌باتی پارلمانی و كێبه‌ركێی و هه‌ڵبژاردنی سیاسیدا.

له‌ پێوه‌ندی ده‌گه‌ڵ ئه‌و كورته‌باسه‌دا، پێویسته‌ ئه‌وه‌ش بگوترێ كه‌ كۆمه‌ڵگای كوردستانی باشوور، ئه‌گه‌ر هه‌ر له‌ سه‌ره‌تای قۆناخی پاش دیاریکردنی ناوچه‌ی پارێزراو(1992)، سستیمی چه‌ند حیزبی و شێوه‌ی پلۆرالیزمی سیاسی و كێبه‌ركێ و هاوكاری ــ نه‌ك شێوه‌ی شه‌ڕ و پێكدادان و دوژمنكاری ــ تێدا پێڕه‌وكرابا، ئه‌وڕۆ مه‌سه‌له‌ی نه‌ته‌وه‌یی كورد به‌ بارێكی زۆرگونجاوتردا ده‌كه‌وته‌وه‌. دیاره‌ زه‌ره‌ر له‌ نێوه‌شڕا بگه‌ڕێته‌وه‌ هه‌ر به‌ قازانجه‌،  بۆیه‌ ‌ئه‌گه‌ر یه‌كێتی(ینك) و پارتی(پدك)  كه‌ له‌ دوو ناوچه‌ی دابه‌شكراودا خاوه‌نده‌سه‌ڵاتن، نه‌شیانهه‌وێ پرۆسه‌ی ئاشتبوونه‌وه‌ و یه‌كگرتنه‌وه‌ی یه‌كجاریی به‌ ئه‌نجام بگه‌یه‌نن، ده‌توانن به‌ پێی سستیمی چه‌ند حیزبی و ده‌نگدان و هه‌ڵبژاردنی پارلمانی هه‌ڵسوكه‌وت و تیکۆشانی سیاسی بكه‌ن. واته‌  هه‌ركام كه‌  زیاتر له‌ 50%ی ده‌نگه‌كانی به‌ ده‌ست هێنایه‌وه‌ به‌ ده‌سه‌ڵات بگا و ئه‌و‌ی دیكه‌یان وه‌ك هاوبه‌ر(ئۆپۆزیسیۆن) له‌ ده‌ره‌وه‌ی جه‌غزی ده‌سه‌ڵاتدا خه‌باتی سیاسی خۆی له‌ پێناو به‌رژه‌وه‌ندی نه‌ته‌وه‌ییدا درێژه‌ پێبدا.

شتێكی ڕوونه‌ كه‌ هه‌ر كۆمه‌ڵگایه‌ك خاوه‌نی سستیمێكی چه‌ند حیزبی و پلۆرالیزمی سیاسی و دیمۆكراسی نه‌بێ، یان خۆی له‌ به‌رانبه‌ر ڕه‌خنه‌ی كارسازی حیزبه‌ ئۆپۆزیسیۆنه‌کان و ڕۆشنبیرانی ئه‌مه‌گداردا نه‌بینێته‌وه‌، ئه‌و كۆمه‌ڵگایه‌ تووشی مه‌یین و داوه‌ستان و نه‌بزووتن و ئاخرسه‌ر گه‌نده‌ڵیی و داوه‌شان ده‌بێ. جا بۆیه‌ لێره‌دا و له‌و ڕ‌وانگه‌یه‌وه‌، قسه‌ و ده‌ربڕینه‌كانی ڕێزدار محه‌مه‌دی حاجی مه‌حموود،  له‌ ئاست یه‌كێتی(ینك) و پارتی(پدك)دا، شیاوی سه‌رنجن. فه‌رموون: ئه‌وه‌ش ئێوه‌ و چاوپێكه‌وتنه‌كه‌. >>>