شه‌ڕه‌فنامه‌ ئه‌گه‌ر به‌ فارسی نووسراوه‌ و ده‌ستی كوردانی پێ ناگا و خزم و هۆزه‌ هه‌ژاره‌كه‌تی تێ ناگا. تۆ كه‌ كوردی و فارسی به‌ ئه‌ندازه‌ی خۆت ده‌زانی و ده‌توانی به‌ پێی توانا كارێك بكه‌ی و بۆ ئه‌و ده‌رده‌ چارێك بدۆزیه‌وه‌، هه‌سته‌ و كه‌مه‌ری كۆشش و ماندووبوون ببه‌سته‌ و هه‌تا ماوی و له‌ به‌ر چاوی و ماوه‌ت هه‌یه‌ ده‌ست به‌ كار به‌ و خۆت له‌و خه‌مه‌شت ڕزگاركه‌ و بیكه‌ به‌ كوردی. با ئه‌گه‌ر مردی له‌ بیر بیریش بچیه‌وه‌، با ئه‌و كاره‌ی كه‌ ده‌یكه‌ی له‌مه‌ڕ مێژووه‌وه‌ كه‌س به‌ هیچی نه‌گرێ، با له‌ لای نووسه‌رانی دواڕۆژی كورده‌وه‌ نرخێكی پێ نه‌درێ، با په‌یوین و نووسینه‌كانت كاڵ و كرچیش بن، با توێڵ و هێڵی دێڕ و پیته‌كانیشت هه‌ڵقرچاو و بێ نمود و پڕ له‌ لۆچ و چرچیش بن، هه‌ر ئه‌وه‌نده‌ بۆ تۆ زۆره‌ كه‌ كوردییه‌كه‌ی ئه‌مڕۆ ده‌یخه‌یه‌ سه‌ر كاغه‌ز و به‌شێك له‌ زوانه‌ جوان و شیرینه‌كه‌ت له‌ پارێزی دز و چه‌ته‌ی داگیركه‌ر ده‌پارێزی و هه‌رچۆنێك بێت له‌ سووچێكه‌وه‌ كه‌لێنێكی پێ پڕ ده‌بێته‌وه‌ و هه‌رگیز به‌ یه‌كجاری ناپووچێته‌وه‌.
له‌وانه‌یه‌ نووسه‌رانی باشی كوردی له‌مه‌وپاش كه‌ ئه‌م نووسراوه‌ی تۆیان دێته‌ به‌ر چاو بزه‌یان به‌ نه‌خوێنده‌واری و كۆڵه‌واری تۆ بێتێ و به‌زه‌ییان به‌ نه‌داری و هه‌ژاری ئاسه‌واری كورده‌واریدا بێته‌وه‌ و له‌ سۆنگه‌ی تۆوه‌ ئیشتیای نووسینیان بكرێته‌وه‌ و بۆ ئه‌وه‌ ده‌ریخه‌ن كه‌ ده‌توانن زۆر له‌ تۆ چاكتر ئه‌و ئه‌ركه‌ پێكبێنن: شان بده‌نه‌به‌ر و سه‌روبه‌رێكی وا به‌ نووسین و ئاخافتنمان بده‌ن كه‌ به‌ شانازییه‌وه‌ خۆ بنوێنین و له‌باتی ئه‌م گوشمه‌یه‌ت مه‌یره‌ و لۆرك بخه‌نه‌ سه‌ر خوان و له‌ جیاتی ئه‌م چه‌ند مۆره‌ خواروبۆره‌ كۆشك و ته‌لاری جوان و له‌بار و سپیكار هه‌ڵخه‌نه‌وه‌.
تۆ سه‌رپلی ته‌شیه‌كه‌ خۆشكه‌،  ئه‌وسا ڕیس  و كر و نه‌خشی ڕه‌نگین و به‌وێنه‌ با له‌ سه‌ر ده‌ستڕه‌نگین و شیرینكاران بێ. تۆ به‌و كاڵه‌ و پێتاوه‌ به‌به‌ن داپێچراوه‌ت ڕچه‌یه‌ك بشكێنه‌ با ڕاوی پڵنگ و شكاری شێران كاری چاپكسواران بێ. خوای گه‌وره‌ فه‌رموویه‌: (له‌ توانابه‌ده‌ر نایخه‌ینه‌ سه‌ر كه‌س). پێشینانی كوردیش كوتوویانه‌: سمۆره‌ گوتی له‌ دار كه‌وتمه‌ خوار دوو منم كه‌م كرد. پرسیان: تۆ خۆت نیو من نابی.. ئه‌و دوو منه‌ت له‌ كوێ هێنا؟ وتی: كاكی خۆم هه‌ر كه‌س به‌ منی خۆی.