جهستهیهک له بهرد و دڵێک له بهفر

•کهژاڵ ئیسماعیل

زریانێک..
ڕێگه به ڕهوی چهپکێ ههور نادات
ئاسمان ساماڵ بێت
وهک گێژهڵووکهیهکی سهرلێشێواو
بهرۆکی نهرمه گڵهکان ئهگرێت و
بهرهو جوگرافیاییهکیان ئهبات
باران
له فهرههنگیدا نهنووسراوه
وشکهڵستانێکه و
تابڵۆکانی ئهم مێژووه
تێیدا بوونه ههڵمێکی بێڕهنگ و
باڵندهیهکی بێدهنگ
زریانێک..
گوڵه خۆری له خاچ داوه و
پهنجهکانی سهمفۆنیایهک
سهر ئهبڕێت
ڕێگهنادات..
چرپه سیحراوییهکان
بکرێنهوه
به گوێی خامۆشیدا
نه ڕێ به فهرهاد ئهدات
سهفهر بۆ عهشقی شیرین بکات و
نه گڕی دڵی «نالی»یهک
به شهماڵی
ههناسهی «مهحبووبه»یهک
بکوژێتهوه
زریانێک..
بۆته تهمتونێكی لێڵ و
هیوا وهنهوشهییهکان
دهنێته بهرزهخی بێئاکامییهوه
وهکو جهستهیهکی بێ ههست
له ژێر سێبهری
تاوانهکانی فیرعهونا
لهنگهر ئهگرێت
ڕێگه به شهپۆلی
گوڵه سونبولهکان نادات
به دهم ختووکهی نهسیمێکهوه
خهونه ڕهنگاڵهییهکان
ببینن و
له سهر گۆنای دهشتهکانی حهز
ماچ بچننهوه
زریانێک..
بۆته دیوهزمهیهکی قهزهم و
هێلانهی
له سهر برژۆڵهجووتبووهکانی
ئهستێرهیهک دروست کردووه
له پهنا شیوهنی ماتهمێکا
بۆته پهیکهر.. یا
بۆخۆی پهیکهرێکه له زریان؟
چون
ئهو زریانه
جهستهیهکه له بهرد و
دڵێکه
له بهفر..!

10-10-2005

• • •